السبت، 21 يوليو 2012

نظرية النبله























كل واحد فينا له توقيت معين هيبتدى فى 


حياته اللى بجد 

اللى ساعتها هيحس ان هوه ده الطريق اللى كان بيدور 

عليه من زمان هوه ده اللى انا اتخلقت علشانه بجد .. بس 

ديما بيحاول معانا الاحباط انه يتملكنى ويقولنا انت كبرت 

غيرك ابتدى من بدرى انت فكرك لسه بعد العمر ده كله فى

 حاجه فى حياتك هتتغير ؟ وقدام اى مشكله يهيئ لك ان 

خلاص الدنيا كده انتهت .. بس انا ما سكتش للاحباط لما

 حاول معايا فاخترعت نظرية النبله او مش اخترعتها يعنى 

تقدر تقول دى حاجه اقنعت نفسى بيها علشان اتغلب على

 اى احباط يصيبنى ونظرية النبله بتقول كل واحد فينا 

محطوط جوا نبله مستنى الدنيا تشدها وتسيبها تنطلق به 

 وكل صدمه بنقابلها فى حياتنا وكل وكل محاولة لينا  

 وكل حاجه بتحصل بنفتكرها  

انها انكسار لينا ومن بعدها هنموت ده مجرد حاجات  بتشد 

الاستك اكتر بتاع النبله علشان بدايتك تكون اقوى وتوصلك 

لمكان ابعد ... لكن لو انت من الناس اللى عايزه حياتها تتغير 

بين يوم وليله من غير اى مجهود واى محاولات فانت كده 

بالظبط حطيت نفسك فى النبله وسبتها من غير ما تشد 

الاستك فطبيعى هتقع مكانك وعمرك ما هتتقدم خطوة واحده

الاثنين، 21 مايو 2012

ذكريات





ذكريات.. الحياه ما بيفضلش منها اى حاجه غير شوية ذكريات كل حاجه بتعملها
فى حياتك دلوقتى بعدها بدقيقه بقت خلاص فى دفتر ذكرياتك 
واللى بيفرق ذكرى عن ذكرى هى اد ايه كانت مهمه فى حياتك لان 
كارت الميمورى بتاعك عمره ما هيقدر يشيل كل ذكرياتك والحمد الله انه
مش بيشلها كلها ..الفكره فى انك وقت ما تبقى فى موقف صعب جدا 
ومش عارف تتصرف وحاسس ان الدنيا خلاص وقفت  خد نفس عميق
وقول لنفسك بكره الصبح الموقف ده هيبقى مجرد ذكرى هحكيها لصحابى ونضحك عليها
بس برده الدنيا مش سهله كده وانك ما تعملش حساب لاى حاجه وتسيبها زى ما تمشى وتقولى اهى هتبقى ذكرى 
لا لازم تخلى ديما دماغك ان كل ذكرى مؤلمة ليك لازم وراها تعمل ذكرى عن ازاى قدرت تتغلب على الالم ده
وكل ذكرى عن فشل لازم يكون معاها ذكرى ازاى قدرت تقف على رجلك من تانى وتنجح 
وكل ذكرى عن نجاح لازم يكون وراها ذكرى تانيه عن ازاى استمريت فى نجاحك واد ايه حاولت ان ما يبقاش فى بعدها ذكرى عن فشل
وفى الاخر حاول يكون مجموع ذكرياتك الكويسه مع الناس اللى حواليك افضل من مجموع ذكرياتك السيئه معاهم
 لانك لما بتموت اه هتاخد الكارت معاك.. بس كل واحد قابلك وعرفك خد منك كوبى من جزء من ذكرياتك 
                                                                      :)

الخميس، 29 مارس 2012

اخر رساله




حبيبتى ايه الاخبار ؟انا عارف ان المفروض انى زعلان منك ومش بكلمك بس انا 

مش بقدر ابعد او اقطع معاكى زى ما انتى عارفه ما انا لو قطعت معاكى هعيش ازاى

 اصلا !!..بس على فكره انا ما غلطش فيكى انا كل الحكايه نفسى اشوف منك تصرف 

او اسمع منك كلمه تحسسنى بحبك ليا ..اه انا ديما بشوف حبى فى عينك بس عمرى

 ما شوفت منك حاجه واضحه تأكد لى ده وما تقوليش انى بنكر اللى بتعمليه وبنسى 

بالعكس ده انا بقيت بتلكك لك على اى تصرف اقنع نفسى به انك بتحبينى  ..عارفه ده 

انا بقيت وانا ماشى  فى الشارع لو لقيت حد ابتسم لى وهوه ماشى اقول يمكن  انتى 

اللى بعتيه ليا علشان  يمكن بابتسامته دى يهون عليا اللى انت بتعمليه فيا

ولو يوم رجعت البيت و لقيت الاكل اللى انا كل اسبوع باكله هوه هوه وكلت ولقيته 

طعمه حلو شويه اقول اكيد انتى عملتى فى حاجه مختلفه 

يخليه يحلو علشان يضيع طعم المر اللى بقيت على طول حاسه فى حياتى..شوفتى 

بقى انا بحبك ازاى وبحاول اتلكك لك على اى حاجه تخلينى افضل احبك :)

انا النهارده قررت انى ابعت لك الرساله دى لان خلاص ما بقاش فى وقت فاضل كتير

 وانا عارفك عنيده وعمرك ما هتبتدى انتى بالصلح 

فقلت ابتدى انا فياريت يا حبيبتى نبتدى صفحه جديده مع بعض وانا هنسى كل اللى 

عملتيه فيا طول عمرى ولو رضيتى عنى هبتدى استمتع 

باللى باقى من عمرى فيكى على اد ما اقدر ..بس انتى بس ارضى عنى قبل فوات الاوان .

الخميس، 8 مارس 2012

مفترق الطرق


فى مفترق الطرق وعندما يحين الوقت لاخذ القرارات المصيريه التى ستغير من حياتك 
دائما ما يكون امامك اختياران او اكثر واحد فقد من بينهم
هوه الاختيار الصحيح


وانا الان اشعر اننى فى مفترق الطرق لا اعلم لماذا ولكن شئ ما يخبرنى اننى فى مفترق الطرق ويجب علي اخذ القرار والاختيار من بين عدت اختيارات ..لكن ما اصعب ان تشعر بذلك وتهم لتفاضل بين الاختيارات المطروحه امامك فتجد انه لا يوجد امامك اى اشياء لتفاضل بينها..فانت لما يأتى بك الى هذا المفترق سوا قطار العمر الذى قطع جزء كبير من مشواره ولكن للاسف قد زج بك شخصك المستهتر الى قطار النوم 


الاثنين، 9 يناير 2012

حوار مع الشيطان




النهارده  وبعد مجهود كبير ومحاولات كتيرة قدرنا نوصل للشيطان فى محبسه السنوى اللى بيروح فى كل رمضان وقدرنا نعمل معاه حوار .. دخل الصحفى  الغرفه عليه لقاه قاعد حزين ومكتئب فرمي عليه السلام وابتدى الحوار

الصحفى : ازيك يا استاذ شيطان

الشيطان : انت شايف ايه يعنى .. مش كويس طبعا

الصحفى : اه معلش يا استاذ شيطان ده كلها شهر وترجع تانى توسوس براحتك للناس

الشيطان: انت فاكرنى زعلان علشان الشهر اللى انا قاعدو هنا

الصحفى: امال 
؟
الشيطان: يااااه يا استاذ .. ده انا كان زمان الشهر ده بالنسبه لى اجازتى السنويه بعد مجهود كبير من الوسوسه والتحريض على الاعمال السيئه بس دلوقتى بقى السنه كلها بقت اجازه

الصحفى:  اجازة ازاى يعنى  ممكن توضح لى اكتر؟؟

الشيطان : اوضح لك ايه ما الحكايه واضحه هوه انتو يا بنى ادمين بقيتو محتاجين لشياطين ده انتو غلبتونى وبقيتو تعملو حاجات انا عمرى ما كنت افكر انى اوسوس لكم بيها

الصحفى : بس اكيد برده يا استاذ شيطان احنا ما نقدرش نستغنى عن خبرت حضرتك فى السفاله وقلت الادب

الشيطان: سفالة وقلت ادب ايه بس ده انا طلعت محترم .. طيب انا هديلك مثال من كام يوم قبل ما اجى هنا لقيت شاب ماشى فى الشارع وقدامه بنت حلوه.. فجريت عليه بسرعه علشان اقوله ادخل عليها وعاكسها.. لسه هوسوس له لقيت راح قرب منها واتحرش بيها على طول من غير اى كلام

الصحفى : يا خبر يعنى هوه عمل كده من غير اى نصيحه او توجيهات منك

الشيطان : اه شوفت بقى.. وياريت الحكايه خلصت لحد كده .. قلت الحق نفسى واعمل حاجه واروح اخلى البنت تلف وتشتمه شتمتين واهوه  ابقى سبب فى اى ذنب حتى لو صغير .. تخيل قبل ما اسوس لها لقيتها عملت ايه

الصحفى :  اكيد طبعا  لفت واديته بالقلم

الشيطان : ياريت ده لقيتها لافت وضحكت له وقالت له ما تبقاش متهور كده فى الشارع تعالى نطلع سوا انا بيتى قريب من هنا

الصحفى : يا خبر ابيض وروحت معاهم؟

الشيطان : اروح معاهم اعمل ايه بقى يا استاذ هوه انا هعرف اقولهم ايه اكتر من اللى هما رايحين يعملوه

الصحفى : لا قلبى معاك بصراحه يا استاذ شيطان

الشيطان: مش بقولك انتو مش بقيتو محتاجين ليا خلاص وانا بقيت عاطل ومن غير شغل حتى انزل شوف بنفسك فى شارع الهرم كان زمان كل الكازينوهات فى رمضان بتقفل لان انا مش موجود فماكنش حد بيفكر يروح هناك ... لكن دلوقتى حتى وانا هنا هما شاغلين ولا فارق معاهم عدم وجودى ولا فارق معاهم رمضان حتى

الصحفى : خلاص خلاص هدى اعصابك يا استاذ شيطان... طيب قولى بتعمل ايه فى باقى الايام مادام مفيش شغل كده؟

الشيطان: والله انا السنه اللى فاتت لما اتخنقت من عاميلكم طلعت الحج
الصحفى : حج؟؟؟؟ بس انت مش هتعرف توسوس للناس وهما بيحجو الناس دى بتبقى مع ربنا بقلبها وعقلها وكل حاجه

الشيطان : لا اوسوس ايه بقى انا بطلت الحكايه دى خلاص .. انا طلعت هناك قلت اهو ابعد عن حرقة الدم  اللى بشوفها فى الشوارع وقلت الادب والسفاله اللى فى كل مكان ومن غير ما اقولهم يعملوها

الصحفى: طيب تحب  تقول ايه للبنى ادمين فى اخر حوارنا

الشيطان : انا مش هقولهم غير حاجه واحده بس .. اتقو الله بقى خلونا نعرف نشتغل تانى

الصحفى: شكرا يا استاذ شيطان !!!!!!

الاثنين، 5 ديسمبر 2011

فُكك منى




الكمال..انا نفسى اكون كامل ..نفسى اكون صافى جدا من جوايا ..بحب كل حاجه وكل الناس ..والناس كلها بتحبنى
بس ثوانى ..انا ما كفرتش ..انا عارف وفاهم ان الكمال ده صفه من صفات الله سبحانه عز وجل ومفيش بشر يقدر يوصل للكمال..بس انا بفكر بالنظرية المحبطه بتاعت اهلى اللى هى لو فكرت تنجح هتسقط ولو فكرت تجيب جيد هتجيب مقبول ولو فكرت تجيب جيد جيدا هتجيب جيد وهكذا..هى نظرية رخمه شوية بس الى حد ما صحيحه.(بس انا طول عمرى ببقى نفسى اعرف اللى بيجبو امتيازات دول بيفكرو فى ايه ؟؟ ) فى مقوله ليا  او تقدرو تقولو عنوان لحياتى انا اختارته بتقول انا لست كاملا ولكنى باحث عن الكمال.. وبداخلى كل الثقه انه شئ من المحال.. وبنظريه اهلى لما هفكر انى اوصل للكمال اكيد عمرى ما هوصل له بس هنول حته ولو بسيطه منه..بس اكتشفت انى عمرى ما هوصل ابدا لاى حاجه منه لان ده شئ مش بايدى انا بس ده بايد الناس اللى حواليا ..والكمال ده لو اتوجد اى جزء منه فده فى المدينه الفاضله وصعب يكون فى عالمنا اللى عايشين فى ده..

وفى كلمه بقى بنسمعها كتيير اوى الايام دى الا وهى الديموقراطيه انا بشوف ان دى جزء من الكمال برده وده شئ صعب نوصل له ..مفيش اى حد مؤمن بالديمقراطيه وفى نفس الوقت ديموقراطي ميه الميه ..حتى لو قدام الناس قلت انك ديموقراطى على الاخر هتلاقى من جواك لما حد يقول راى ضد رايك او مش عجبك هتبقى نفسك تمسكه تضربه وتقولو اسكت ياض يا تييييت..بس تقول  لنفسك لا يا واد اهدى ده انت ديموقراطى ..وتلاقى بقى خناقات ومؤتمرات وناس بتزعق وناس بتضرب بعض تيجى تسأل تشوف فى ايه ..يقولك دول ناس بيدعو للديمقراطيه والليبراليه ... انا عن نفسى بكره كل المصطلحات دى ونويت اعمل حزب خاص  بيا ولكل الناس اللى زهقت من الناس اللى عمال تزعق دى..وهسميه حزب "فكك منى" ..وفى اقتراح تانى "دماغك ياعم"..وافتكر برنامج الحزب باين من اسمه..اللى هوه انا معنديش برامج فكك منى بقى ...ولا تقولى ديموقراطيه ولا ليبراليه ولا اسلاميه ولا هندية ...كل واحد يخليه فى حاله..واوعى حد يقولى ده حزب سالبى ومش ليه لازمه.. لا ازاى ده هيكون من انشط الاحزاب ومتاكد ان اغلبية الشباب هينضمو له.. لاننا كلنا هنقول راينا..بس بشرط ماحدش ليه دعوه برأى التانى..وماحدش يحاول يقنع حد برأيه ...كل واحد يقول رايه واللى مش عنده راى يسمع ويختار الرأى اللى يعجبه ... وبكده هتبقى الحياه هاديه وبيس ومفيش اى دوشه من اللى بنشوفها الايام دى ... واى حد هينتقضنا او يهاجمنا او يكلمنا كلنا هنقولو فى صوت واحد فكك منى ... وبكده هيزهق مع الوقت لما يلاقينى مش برضى الغريزة اللى جواه فى الخناق والزعيق ومع الايام  هيتخنق وينضم للحزب علشان الناس تفكها منه... وبرنامج الحزب بتاعى متاح لجميع الاحزاب انها تاخده وتطبقه... ياريت كل الاحزاب والجامعات تفكها من بعضها لاننا مش داخلين حرب..المفروض اننا عايزين كلنا مصلحه البلد فكل واحد يفكو من التانى ويشتغل فى صمت ويطلع يقول رايه بهدوء وحلاوه كده وماحدش يعترض عليه عجبك الراى انضم ليهم مش عاجبك افضل قاعد مستنى البرنامج اللى بعده و اسمع الراى التانى يمكن يعجبك..والله لو كل واحد بقى فى حاله كده وكل حزب بقى مع نفسه ...الحياه هتبقى هاديييه وجميله والناس كلها هتشتغل ومصر هتبقى زى الفل ان شاء الله..وماتنسوش احنا ليه قلنا الكلام ده كله..الكمال...ولو عايز تجيب امتياز...نفسى اعرف هتفكر تجيب ايه؟؟؟

موسم التزاوج


كل سنة وانتم طيبين ..بمناسبة ايه ؟!مش عارف بصراحه بس عادى انا مصرى و ده شئ طبيعى انى اقول  الكلمه دى فى اى وقت ومن غير مناسبه
بس مش تخافو مش عايز منكم فلوس.

المهم بمناسبة المناسبات  لو  جيت يوم من الايام  ونزلت الشارع لقيت الدنيا كلها بقت حمرا ..الناس كلها لابسه احمر .. وشايله حاجات فى ايديها حمرا..
ما تستغربش.وما تفتكرش ان الاهلى خد الدورى ..بس هوه اكيد هياخده كالعاده..ولكن اعلم يا عزيزى القارئ حينما ترى الدنيا حمراء.اذا هوه موسم التزاوج
موسم العاطفه ..موسم هابى فلانتين داى ..انه عيد الحب 

اكيد كل الناس اللى مش مرتبطه زى بتكره اليوم ده جدا..مش لانها نفسها تحب ولا حاجه ..بس لان اليوم ده بتبقى كل حاجه فى اوفر اوى 
خصوصا فى الجامعات تلاقى كل الناس شايله دباديب حمرا..وعلب حمرا ..وكل واحد قاعد مع واحده  والحب والهيام  مغرقهم وبيدلدق على اللى جنبهم
وكأنهم اذ فجأة اكتشفو انهم بيحبو بعض..انا مش ضد الحب ولا معقد علشان ماحدش يقولى ان بحقد..بس بصراحه الموضوع بقى تحس انه حفظ مش فهم
يبقى الولد مش طايق يبص فى وش البنت وخلاص زهقو من بعض  وبقالهم اسبوع مش بيكلمو بعض اساسا..بس يجى اليوم ده يتصل احد الطرفين بالاخر
بقولك ايه يا حبيبتى مش معقول هنقضى اليوم ده لوحدنا ..تقوله لا طبعا يا حبيبى  انا مش طيقاك ولا طايقه ابص فى خلقتك بس كله الا اليوم ده..
وتروح مشغلى له قولى بحبك بصوت عالى..يقوم الواد نازل جرى جايب الدبدوب الاحمر ورايح يقابلها 

ويا سلام برده لو انت مش مرتبط زى كده وقعدت تسمع الراديو خصوصا اسامه منير او تتفرج على التلفزيون فى اليوم ده..هتلاقى نفسك فى حاجه مش طبيعيه
حاسس بيها فى نهاية اليوم..هتلاقى فى طاقه حب فظيعه طلعت على جتتك  وماسكه فيك زى الارتكريه..

ارجع تانى واقول انا مش ضد الحب برده..بالعكس الحب ده اجمل شئ فى الحياه..بس الحب اللى بجد..الحب اللى مبنى علشان انا شايف فى البنت 
دى ام عيالى ..وهى شيفانى راجلها وابو عيلها..ناس هتقولى انت قديم جدا على فكره
بس فكر كده لو مره حسيت الاحساس ده مع بنت..او انتى حستيه مع ولد..هتلاقي المره دى كانت مختلفه عن اى مره حبيت فيها
وقارن بين المره دى واى مره تانيه..اول حاجه تعرف بيها ان الحب ده صح او غلط ..لما تلاقى نفسك اخر حاجه بتفكر فيها مع البنت دى هى شهوتك
وتلاقى حياتك فعلا اتغيرت وانك عايز تبقى انسان تانى ..لكن الحب اللى بيجى فى موسم التزاوج ده وان انا لازم ارتبط من باب عيب ابقى سينجل وصحابى
كلهم مصحابين..والبنات اللى بتنفسن لما تشوف الهدايا اللى جايبها  حبيب صحبتها فتروح تقرر وتدخل على اول ولد يقابلها تقول تعالى ارتبط بيا بس بشرط
تجيب لى هدايا احسن من هدايا صحبتى
كله ده تضييع وقت..ومجرد تقليد للغرب فى ظاهرت (البوى فريند)وعمره ابدا ما بيستمر 
ولو استمر يبقى  مامت حضرتك داعيه عليك لانك هتعيش حياة مش لذيذه خالص..ما تقوليش ده انت عيل كئيب ومتشائم صحيح..وما تقوليش
فيها ايه ياعم ما اصاحبها شوية ولو عجبتنى اكمل ونتجوز..من الاخر مش تضحك على نفسك
وحب البنت اللى انت شايف فعلا ان دى تنفع تبقى ام اولادك من جميع النواحى..حب البنت لما تلاقى عقلك قبل قلبك مقتنع بيها ومشدود ليها
وحتى لو قدامك بنت مش تمام وهى بطبعها واخده الارتباط ده كنشاط صيفى معتاد ..سيبك منها ولو على التسليه مفيش اكتر من الحاجات اللى بتضيع الوقت
بس صدقنى لو عملت كده هترجع  بعد كام سنه كده لما تكبر وتعقل ..ده لو ربنا كرمك وعقلت.. هتبقى قرفان من كل البنات دى والزكريات اللى معاها
وندمان انك ضيعت وقتك فى علاقات زى دى.
من الاخر حبها.. لما تبقى متاكده ميه فى الميه ان هى دى اللى عايز تعيش باقى العمر جنبها