الاثنين، 5 ديسمبر 2011

فُكك منى




الكمال..انا نفسى اكون كامل ..نفسى اكون صافى جدا من جوايا ..بحب كل حاجه وكل الناس ..والناس كلها بتحبنى
بس ثوانى ..انا ما كفرتش ..انا عارف وفاهم ان الكمال ده صفه من صفات الله سبحانه عز وجل ومفيش بشر يقدر يوصل للكمال..بس انا بفكر بالنظرية المحبطه بتاعت اهلى اللى هى لو فكرت تنجح هتسقط ولو فكرت تجيب جيد هتجيب مقبول ولو فكرت تجيب جيد جيدا هتجيب جيد وهكذا..هى نظرية رخمه شوية بس الى حد ما صحيحه.(بس انا طول عمرى ببقى نفسى اعرف اللى بيجبو امتيازات دول بيفكرو فى ايه ؟؟ ) فى مقوله ليا  او تقدرو تقولو عنوان لحياتى انا اختارته بتقول انا لست كاملا ولكنى باحث عن الكمال.. وبداخلى كل الثقه انه شئ من المحال.. وبنظريه اهلى لما هفكر انى اوصل للكمال اكيد عمرى ما هوصل له بس هنول حته ولو بسيطه منه..بس اكتشفت انى عمرى ما هوصل ابدا لاى حاجه منه لان ده شئ مش بايدى انا بس ده بايد الناس اللى حواليا ..والكمال ده لو اتوجد اى جزء منه فده فى المدينه الفاضله وصعب يكون فى عالمنا اللى عايشين فى ده..

وفى كلمه بقى بنسمعها كتيير اوى الايام دى الا وهى الديموقراطيه انا بشوف ان دى جزء من الكمال برده وده شئ صعب نوصل له ..مفيش اى حد مؤمن بالديمقراطيه وفى نفس الوقت ديموقراطي ميه الميه ..حتى لو قدام الناس قلت انك ديموقراطى على الاخر هتلاقى من جواك لما حد يقول راى ضد رايك او مش عجبك هتبقى نفسك تمسكه تضربه وتقولو اسكت ياض يا تييييت..بس تقول  لنفسك لا يا واد اهدى ده انت ديموقراطى ..وتلاقى بقى خناقات ومؤتمرات وناس بتزعق وناس بتضرب بعض تيجى تسأل تشوف فى ايه ..يقولك دول ناس بيدعو للديمقراطيه والليبراليه ... انا عن نفسى بكره كل المصطلحات دى ونويت اعمل حزب خاص  بيا ولكل الناس اللى زهقت من الناس اللى عمال تزعق دى..وهسميه حزب "فكك منى" ..وفى اقتراح تانى "دماغك ياعم"..وافتكر برنامج الحزب باين من اسمه..اللى هوه انا معنديش برامج فكك منى بقى ...ولا تقولى ديموقراطيه ولا ليبراليه ولا اسلاميه ولا هندية ...كل واحد يخليه فى حاله..واوعى حد يقولى ده حزب سالبى ومش ليه لازمه.. لا ازاى ده هيكون من انشط الاحزاب ومتاكد ان اغلبية الشباب هينضمو له.. لاننا كلنا هنقول راينا..بس بشرط ماحدش ليه دعوه برأى التانى..وماحدش يحاول يقنع حد برأيه ...كل واحد يقول رايه واللى مش عنده راى يسمع ويختار الرأى اللى يعجبه ... وبكده هتبقى الحياه هاديه وبيس ومفيش اى دوشه من اللى بنشوفها الايام دى ... واى حد هينتقضنا او يهاجمنا او يكلمنا كلنا هنقولو فى صوت واحد فكك منى ... وبكده هيزهق مع الوقت لما يلاقينى مش برضى الغريزة اللى جواه فى الخناق والزعيق ومع الايام  هيتخنق وينضم للحزب علشان الناس تفكها منه... وبرنامج الحزب بتاعى متاح لجميع الاحزاب انها تاخده وتطبقه... ياريت كل الاحزاب والجامعات تفكها من بعضها لاننا مش داخلين حرب..المفروض اننا عايزين كلنا مصلحه البلد فكل واحد يفكو من التانى ويشتغل فى صمت ويطلع يقول رايه بهدوء وحلاوه كده وماحدش يعترض عليه عجبك الراى انضم ليهم مش عاجبك افضل قاعد مستنى البرنامج اللى بعده و اسمع الراى التانى يمكن يعجبك..والله لو كل واحد بقى فى حاله كده وكل حزب بقى مع نفسه ...الحياه هتبقى هاديييه وجميله والناس كلها هتشتغل ومصر هتبقى زى الفل ان شاء الله..وماتنسوش احنا ليه قلنا الكلام ده كله..الكمال...ولو عايز تجيب امتياز...نفسى اعرف هتفكر تجيب ايه؟؟؟

موسم التزاوج


كل سنة وانتم طيبين ..بمناسبة ايه ؟!مش عارف بصراحه بس عادى انا مصرى و ده شئ طبيعى انى اقول  الكلمه دى فى اى وقت ومن غير مناسبه
بس مش تخافو مش عايز منكم فلوس.

المهم بمناسبة المناسبات  لو  جيت يوم من الايام  ونزلت الشارع لقيت الدنيا كلها بقت حمرا ..الناس كلها لابسه احمر .. وشايله حاجات فى ايديها حمرا..
ما تستغربش.وما تفتكرش ان الاهلى خد الدورى ..بس هوه اكيد هياخده كالعاده..ولكن اعلم يا عزيزى القارئ حينما ترى الدنيا حمراء.اذا هوه موسم التزاوج
موسم العاطفه ..موسم هابى فلانتين داى ..انه عيد الحب 

اكيد كل الناس اللى مش مرتبطه زى بتكره اليوم ده جدا..مش لانها نفسها تحب ولا حاجه ..بس لان اليوم ده بتبقى كل حاجه فى اوفر اوى 
خصوصا فى الجامعات تلاقى كل الناس شايله دباديب حمرا..وعلب حمرا ..وكل واحد قاعد مع واحده  والحب والهيام  مغرقهم وبيدلدق على اللى جنبهم
وكأنهم اذ فجأة اكتشفو انهم بيحبو بعض..انا مش ضد الحب ولا معقد علشان ماحدش يقولى ان بحقد..بس بصراحه الموضوع بقى تحس انه حفظ مش فهم
يبقى الولد مش طايق يبص فى وش البنت وخلاص زهقو من بعض  وبقالهم اسبوع مش بيكلمو بعض اساسا..بس يجى اليوم ده يتصل احد الطرفين بالاخر
بقولك ايه يا حبيبتى مش معقول هنقضى اليوم ده لوحدنا ..تقوله لا طبعا يا حبيبى  انا مش طيقاك ولا طايقه ابص فى خلقتك بس كله الا اليوم ده..
وتروح مشغلى له قولى بحبك بصوت عالى..يقوم الواد نازل جرى جايب الدبدوب الاحمر ورايح يقابلها 

ويا سلام برده لو انت مش مرتبط زى كده وقعدت تسمع الراديو خصوصا اسامه منير او تتفرج على التلفزيون فى اليوم ده..هتلاقى نفسك فى حاجه مش طبيعيه
حاسس بيها فى نهاية اليوم..هتلاقى فى طاقه حب فظيعه طلعت على جتتك  وماسكه فيك زى الارتكريه..

ارجع تانى واقول انا مش ضد الحب برده..بالعكس الحب ده اجمل شئ فى الحياه..بس الحب اللى بجد..الحب اللى مبنى علشان انا شايف فى البنت 
دى ام عيالى ..وهى شيفانى راجلها وابو عيلها..ناس هتقولى انت قديم جدا على فكره
بس فكر كده لو مره حسيت الاحساس ده مع بنت..او انتى حستيه مع ولد..هتلاقي المره دى كانت مختلفه عن اى مره حبيت فيها
وقارن بين المره دى واى مره تانيه..اول حاجه تعرف بيها ان الحب ده صح او غلط ..لما تلاقى نفسك اخر حاجه بتفكر فيها مع البنت دى هى شهوتك
وتلاقى حياتك فعلا اتغيرت وانك عايز تبقى انسان تانى ..لكن الحب اللى بيجى فى موسم التزاوج ده وان انا لازم ارتبط من باب عيب ابقى سينجل وصحابى
كلهم مصحابين..والبنات اللى بتنفسن لما تشوف الهدايا اللى جايبها  حبيب صحبتها فتروح تقرر وتدخل على اول ولد يقابلها تقول تعالى ارتبط بيا بس بشرط
تجيب لى هدايا احسن من هدايا صحبتى
كله ده تضييع وقت..ومجرد تقليد للغرب فى ظاهرت (البوى فريند)وعمره ابدا ما بيستمر 
ولو استمر يبقى  مامت حضرتك داعيه عليك لانك هتعيش حياة مش لذيذه خالص..ما تقوليش ده انت عيل كئيب ومتشائم صحيح..وما تقوليش
فيها ايه ياعم ما اصاحبها شوية ولو عجبتنى اكمل ونتجوز..من الاخر مش تضحك على نفسك
وحب البنت اللى انت شايف فعلا ان دى تنفع تبقى ام اولادك من جميع النواحى..حب البنت لما تلاقى عقلك قبل قلبك مقتنع بيها ومشدود ليها
وحتى لو قدامك بنت مش تمام وهى بطبعها واخده الارتباط ده كنشاط صيفى معتاد ..سيبك منها ولو على التسليه مفيش اكتر من الحاجات اللى بتضيع الوقت
بس صدقنى لو عملت كده هترجع  بعد كام سنه كده لما تكبر وتعقل ..ده لو ربنا كرمك وعقلت.. هتبقى قرفان من كل البنات دى والزكريات اللى معاها
وندمان انك ضيعت وقتك فى علاقات زى دى.
من الاخر حبها.. لما تبقى متاكده ميه فى الميه ان هى دى اللى عايز تعيش باقى العمر جنبها